Cambridge, St John’s College, MS 271
Images courtesy of St John’s College, Cambridge.
T. sancti Andree apostoli Roffensis eccelsie. Multipliciter provocati, tum contiguitate locorum, tum vicinitate religionis, maxime experiential beneficiorum, lacrimas fundimus, qui testes sunt, ut ait Augustinus, intimi doloris. Eapropter compatientes sancto collegio vestro, karissime domne et honorabiles, animam priorisse vestre et more solito absolvimus et nomen ejus nominibus fratrum nostrorum ascripsimus et in commune beneficium ecclesie nostre plenarie recepimus. Preterea, quia duo tricennalia in hoc anno in ecclesia nostra celebraturi sumus, horum participem eam constituimus. Sed et unisquisque sacerdos pro ea tres messias celebrabit, reliqui inferioris ordinis equipollens servitium psalmorum persolvet. Anima domne Amphelise, priorisse de Lillechirch, et a. o. f. d., per m. D. r. i. p. Amen. Oravimus pro v. p. n.
Universis Christi fidelibus presentem paginam inspecturis Humilis ancillarum Christi conventus ecclesie S. marie de lillecherch salutem in domino sempiternam. Post imbres lacrimarum et fletuum inundationem quam in transsitu karissime domine et matris nostre piissime Amphelise, priorisse vidimus, que, vocante domino, quinto decimo kal. Febr. viam a qua nullus in hanc vitam revertitur, ingressa celo terreque debitum humani generis persolvit, terra, quod suum est recipiente et spiritu revertente ad dominum, qui fecit illum, et postquam exequiarum sollempnia explevimus, quibus nec siccis occulis nec sine crebis singultibus interesse potuimus manum misimus ad chalamum universitati vestre scripto denunciantes chalamitatem quam patimur. Subtra(c)ta enim tanta matre, tam fida, comite in via hac qua ambulamus simul et cor nostrum dereliquit nos. Hec enim dilecta deo et hominibus, quod insigne est in hiis qui presunt in omnibus se ipsam nobis bonorum operum prebuit exemplum. Requiescebat in ea spiritus noster, per quam licebat delectari in domino, meditari liberius, orare securius. Erat enim nobis exemplo eius oratio pinguior, lectio frequentior et affectus ferventior, sed sublata est et hec omnia simul. Dolemus igitur in domino, dilectissimi, dolemus nobis ademptum, tam dulce solatium, tam fidele auxilium, tam salutare consilium. Dolemus, non quia dolenda sed quia ablata. Credimus enim, quod mors eius in conspectu domini sit preciosa, quam precesserunt gloriose conversationis insignia. Tamen quia nullus adeo perfectus est, qui vite huius spacia pertranssire possit quin saltem in minoribus et levibus peccatis frequenter offendat, universitatem vestram rogamus attencius, ut, nostre amaritudini condolentes, predicte matri nostre beneficia orationum vestrarum impendatis. Tenemur itaque caritatis vinculo, quo religiosi et sancti mutuo ligantur in domino pro defunctis vestris exorare ut a peccatis solvantur. Subvenite igitur, fratres karissimi, anime priorisse nostre defuncte piis orationibus vestris, ut omni labe purgata, intret in gaudium domini sui, recipiens cum sanctis et electis dei refrigerii sedem, quietis beatitudinem luminis claritatem. Prestante domino nostre Jhesu Christo, cui est honor et gloria in secula seculorum. Amen.